Балаларға базарлық

Ақыр мен тақыр
Асық ойнап тақырда,
Ат байлаған ақырға,
Асыр салған балалар
Айналады батырға.

Оқу мен мұрат
Кітап оқып тұратын,
Оқығанын ұғатын,
Білім қуған балалар
Табады өмір мұратын.

Мақсат пен жақсы ат
Жастай ұмтыл жақсы атқа,
Жетемін деп мақсатқа,
Оқуыңды ақсатпа,
Ата-анаңды қақсатпа.

Доп ойна
Достарыңмен доп ойна,
Доп ойнасаң, көп ойна,
Допқа бола дауласпай,
Тату, тәтті боп ойна!

Жарыс
Жүгіріңдер жарысып,
Күресіңдер алысып,
Жата бермей диванда,
Телефонға жабысып!

Егіз лақ
Ақ ешкіміз лақтап,
Егіз тапты аппақ,
Егіз деген нешеу,
Кім қанеки таппақ?

Бақбақ
Қыр басында бақбақ,
Гүлдеп өсті қаптап,
Кел айтайық мақтап,
Бақбақ жайлы тақпақ!

Жусан
Қырға шығып тұрсаң,
Бұрқырайды жусан,
Жусаныңды сыйла,
Ата жолын қусаң.

---