Құс көрмеймін қаланың аспанынан

Құс көрмеймін қаланың аспанынан…
қайда кеткен қанатты туыстарым?..
жылу іздеп жапанның тастарынан,
паналай ма үй асты қуыстарын…

бүлкілдетер секемшіл бүйректі не…
бұлбұл тұтқын билікке, бұлғын – дәрі…
уысынан жем беріп үйретті ме,
сәулетті үйдің дәулетті тұрғындары…

қарлығашым, қанаттас кептерлерім,
қайда жүрсің еркіңмен ұшып-қонбай?..
саңғып кеткен қыран құс бөктерлерін,
жалап-жұқтап, жағып жүр пысық торғай…
құс көрмеймін қаланың аспанынан…