Сен барда

Сен барда, көңілдің бір құлпы,
Ашылар кілтіңмен бұрымды.

Сен барда, жанымда періште,
Үймелеп жап-жақсы жыр тұнды.

Сен барда, білемін жайдарымын,
Сол үшін сүйемін айдарлым.

Сен барда, төрткүл бір дүниені,
Өзіңмен аралап қайтармын.

Сен барда, көктемім, күз, қысым.
Жаздай боп өтеді байқадым.

Сен барда, жоқ болып кетеді,
Сайтандар қолдаған сайқал мұң.

Өзіңді жеп қойғым келеді,
Қалайша тәттіме айналдың?

Түсінбей қалғаным соншалық,
Өзімде тәттіге айналдым.

Қолыңнан ұстап ап арманға,
Құс жолын көріп-ақ жайнармын.

Елігім, сен болсаң жанымда,
Бақыттың сеземін қайнарын!