Әке бейітінің басында – Бақтыбай Жайлау

Асқар тау, алып нар тұлғам,
Ұланың келді артыңнан.
Өмірден мынау өзіңсіз
Өткізіп уақыт сан жылдар.
Осынау кезең ішінде
Оралып оңға ісім де,
Қол жетті талай нәрсеге
Талпыныс еткем үшін де.
Шаттыққа толы кездерім
Өзіңді талай іздедім.
Кей арман болды табысым,
Дей алман бірақ: «сезбедің».
Сәттерім де көп сүрінген,
Шарасыздығым білінген,
Бойдағы міндет салмағы
Ауырлап белім бүгілген.
Сын шығар бәлкім бұл маған,
Ол үшін артпан мұң саған.
Көшімді жүре түзетіп,
Күшімді жұмсап шыңдалам.
...Асқар тау, алып нар тұлғам,
Ұланың келді артыңнан.
Жәрдем болсын жаныңа
Аятым Хаққа айтылған.