Тірліктің тілер түнегін – Гүлманат Әуелхан

Тірліктің тілер түнегін,
Қайраты қайда жүректің.
Даламның әсем гүлі едім,
Жанымды неге мұң өптің.

Қызарып батқан күн сынды,
Жанымның солғын жалыны.
Жұлдызсыз соқыр түн сынды,
Кеудемде қобыз сарыны.

Кімдерден медет күтемін,
Меңдетті нала тағыда.
Белгісіз кімді күтемін,
Арқамды тосып жауынға.

Бақытқа құштар жүрекпен,
Балауса мұңды кешкенмін.
Даламда көркем нұр өпкен,
Ақша бұлт болып көшкенмін.

Аспаннан іздеп бағымды,
Аспаққа барып асылғам.
Тағдырға теліп таңымды,
Шуақ боп көктен шашылғам…