Қос шынарым

Қос шынарым – екеуіңсің,
Қос құшағым – апа, сіңлі.
Сағынармын тілдеспесем,
Көрмегендей Ай мен Күнді.
Бәсеңдесе, әл-қуатым
Өздеріңе шағым айтам.
Жаңа доспен танысқанда
Қос шынарым барын айтам.
Қос шынардың бұтағына,
Жырдан жібек бау өрейін,
Жалғап алып әлпеншекте
Тербетіліп, еркелейін.
Еңсе түзер қос шынарым,
Жол көрсетер қос шырағым.
Тілекші боп аман жүрші,
Қос шынарым, қос шырағым!

---