Сен де бірі сияқты ең сүйкімдінің – Сәкен Иманасов

Сен де бірі сияқты ең сүйкімдінің,
көкірегі көрікті күй тілдінің, ...
Осы араға келгенде жасып-ақ тұр,
қашып-ақ тұр, қайтейін, ұйқым бүгін.
Арғы жағын, ажарлым, байыпта да,
енді мені бекерге айыптама,
бір керегім болар деп жүрген едім
жүрегім мен жанымды жайып қана.
Жүрген едім болар деп бір керегім,
ашып айтып, оған да үндемедің,
қадірімді білетін сен болмасаң,
сөзім өте қойыпты кімге менің.
Сауығы аз да бүл күнде, ауыры көп,
бара жатыр көңілдің дауылы үдеп, —
ойлаушы едім өзіңді
күй тілдінің,
сүйкімдінің ішінде тәуірі деп!...
Жүйрік еді демесең баптауы кем,
жалғандыққа жасымнан жаттау ұл ем,
өзің айтып жүргендей,
мен де, қалқам.
ер-азамат ішінде тәп-тәуірі ем!...
Ардан аттап кете алмай,
жардан аттап, түнде керіп түсімде,
таңда мақтап,
айналама қарамай, айнаға да,
қайда бара жатырмын қаңғалақтап?!