Күләш апама арнау

Ақын қыздар ұлтымыздың жүрегі,
Мәңгі өшпес тарихтың да тірегі.
Елім деген аруларың аяулы,
Құрметтейді, қазақ елі біледі.

Көрмедім өзіңдей бір қайраткерді.
Жаратқан қаламыңмен қайрат берді.
Әділдікті әрдайым қолдап жазған,
Әрбір сөзің адамзатқа қайрат берді.

Өлеңдерің ойландырды халайықты,
Оқырмандар ойыңды қалай ұқты?!
Дүйім жұрттың алдында сөз айтқанда,
Басын изеп, мақұлдады талай мықты.

Ұлылығың байқалса жүзіңізден,
Қайсарлығың көрініп тұр көзіңізден.
Адал болып, шыншыл болып өссе деймін,
Бүгінгі ұрпақ ғибрат алған сөзіңізден.

Өзіңіздей ерекше жан бізде көп пе?
Жетелеген өзін-өзі тек биікке.
Сегіз қырлы, бір сырлы біздің ару
Ақ халатты абзал жанды мейірбике.

Біздің қалам ұшталсын шыншылдыққа,
Әрқашанда жеңіс бар бір шындықта.
Оған дәлел апатай өзің жазған
Ұсынылған кітабың лауреаттыққа.

Мен теңеймін өзіңізді аспанға,
Қаламды алып, өлеңіме қосқанда.
Менен тілек апатайым әрқашан,
Жүре бергін жол көрсетіп жастарға.

---