Серт

Тостағаны уға тола ғасырда
Менiмен бiрге бола аласың ба?
Бұл дүниеден булықса даусым,
Ол дүниеден ораласың ба?
Мiнезi шəркез мына ғасырда
Балапан басып құлама шыңға,
Алты айлық жолдан аңсап бiр келсем,
Алдымнан күлiп шыға аласың ба?
Құдайдың мынау Құтханасында
Жұмаққа барар жұп боласың ба?
Шыңырауға түссем,
Шырқырап жаның,
Құласам құздан, құтқарасың ба?
Тағдырдың –
Iшi тар кемесiнде
Талықсып кетсем, əл бересiң бе?
Қара суға күнiң қарап қалса да
Қара басымды Хан көресiң бе?
Екi де көзiң мөлдiреп, күлiп
Жетегiме ершi жең-бiлек түрiп.
Сен «Ерiм» десең, мен «Жарым» дейiн
Ерiп те балқып елжiреп тұрып!

---