Қауышу – Исраил Сапарбай

Мен саған өкінбеймін кеш келдің деп,
Онсыз да өмірімнен өшкен күн кеп.
Сен маған қарсы жүріп келетқанда
Жүрегім дүрс-дүрс соқты:
«қош келдің», – деп.
Мен саған өкінбеймін кеш келдің деп,
Онсыз да көңілімнен көшкен күн көп.
Сен маған қарсы күліп келетқанда
Жүрегім лүп-лүп соқты: «не істермін?», – деп.
Жүрегім жүріп... жүрмей...
Тоқтай қалып..,
Қалықтап,
Қиял құсы көкті айналып...
Өртеніп сағыныштың алауымен
Сен кірдің құшағыма оттай жанып!
Ғажабы ғашықтардың бар ма осындай?! –
Балқыдым қызуыңа қорғасындай.
...Қоштасып сеніменен қайтқан соң да,
Бір өзім келе жаттым жолға сыймай!