Қайта жанды өшкен нұрым

Қайта жанды өшкен нұрым,
Қайта оралды көшкен күнім.
Көктөбеге шақырғандай
Көктемеде өскен гүлім.
Көзге көрік, жанға дəрі –
Шақырғандай алма бағы.
Үзілмеген үмітімді
Келдің бе екен жалғағалы?
Төрт құбылам құбылмалы
Ұғынбады, ығырлады...
Қаншама рет шыбын жаным
Шыңырауда шырылдады?..
Сезімімнің шырын балы
Сен бе деп ем ғұмырдағы,
Бақытымды кім үркітті?
Жақұтымды кім ұрлады?
Қылқобызда мың ырғағы
Қызыр ма едің Қырымдағы? –
Аққу қонған айдындайын
Кеуде тұсым шымырлады...

---