Бағдаттың ұқсай қалып сайқалына – Исраил Сапарбай

Бағдаттың ұқсай қалып сайқалына
Туыпты-ау шалқасынан Ай тағы да.
Жалынып, жалбарынып жаратқанға,
Жасайтын қара басып қайта күнə.
Құдай-ау, қайда менің «Ай» дегенім?
Салмағы сары алтынға сай дегенім?
Балаған арманыма «алтын балық»
Ілінді қармағына қай неменің?
Ай қайда?
Алқаракөк аспан қайда?
Бəлекет тас төбемнен басқандай ма?
Қалқамды қара түнде қапқа салып
Қарақшы Қап тауына қашқандай ма?.
Жо-жо-жоқ!
Қарақшы емес, қашқан – бұлт,
Қайтесің, қамкөңілім, аспанға ұлып.
Одан да шалқасынан туған Айды
Ұйқыдан оятсаңшы шаштан бүріп!