Сәйкессіздік

Құндыз ішік,
бұлғын бөрік,
Көз қуантар,
сәнге серік
Затсың,
бірақ қоса алмайсың
Кигендерге ақыл бөліп...
Не болмаса тұрар пұлға,
Жан-жүректі бөлеп нұрға,
Кигендердің жасын ептеп
Шегерсең ғой бір он жылға.
Көз суарып, «келісіпті»,–
Дейтұғындай, сол ішікті
Бүркесе ғой ойқы-шойқы
Бойындағы кемістікті.
Танымайды адамды кім,
Түсінбейді бағаңды кім.
Бұлғын бүркеп тұра алмайды
Бадырайған жамандығың.
Мүмкіндік пен қажеттілік,
Сәйкеспейсің кезек тұрып.
Үйлестіру бұл екеуін
Керек етеді көп ептілік...

---