Қайтып келіп

Қырық үй болып қызын тыйған,
Ең асылдан жасау жиған.
Барша ауыл ат салысып,
Отау берген тарту сыйдан.
Халық едің қайран елім,
Қыз бермеген таппай теңін.
Он үшінде ой түсіріп,
Жиған қыздың етек-жеңін.
Шықпаған қыз жаман аты,
Қорланбаған текті заты. 
Мәңгі қалған алтын ұя —
Ақ босаға алған аты.
Қызы кері аттамаған,
Ондай қызға бақ қараған.
Қайта шапқан жауға балап,
Ел бетіне дақ санаған.
Қонағым деп, аяулы елік,
Аттандырған барын беріп.
Ата-анасын жер қылған жүр
Тойы өткен соң қайтып келіп.

18.03.1999 жыл.