Біліп пе ең – Тұрсынхан Әбдірахманова

Нарық деген не екенін біліп пе ең?
Он үш-ақ сом бір тиындық сіріңкең
Арпалысып ал да, құнын асыр сен,
Нарық осы, ал бойына сіңірсең.
Енді қалған ғұмырында сауда үйрен.
Айық ескі адалдықтан сау күйден.
Асыр, жұмса бар білгенің байлық қу,
Бизнесмен бол ақша күреп, тау үйген.
Капиталист бол тек пайданы көздеген.
Ебін тауып қымқырып қал өзгеден.
Ата-бабаң істемеген кәсіп бұл
Арамнан мал жыюға әсте төзбеген.
Бірақ бұған сен барасың амалсыз,
Түп тегінен болсаңдағы хабарсыз.
Ар сақтамай, жан сақтауға көшсе жұрт,
Ұрандаумен не тындыра аларсыз!
Саудагерлік коғам күллі жер үсті.
Ғажап санап биліктілер келісті.
Күшті, тісті ғана өмір сүре алар
Тағылардың тәртібін жон көрісті.
Ақылдылар ғана қалып өмірде
(Шынын айтты қарамай-ақ көңілге)
Ақымақтар жер бетінен құрымақ
Оған орын жоқ нарықтық өңірде.
«Ақыл ағып кетіп жатыр» деп бізден
Кез жасы көл адасып қап көп ізден...
Айыптыға саналады кей асау
Ажырамас түпкі терең негізден.
Міне үңілсең төркініне нарықтың
Шырқын бұзған шырылдатып халықтың
Бір ғана «изм» болашаққа қақылы
Әрекет қып жатыр оны танып кім.