Кел, жаңа ғасыр

Кел, Жаңа жыл! Кел төрлет жана ғасыр!
Адамдардың мерейін аспанға асыр,
Саған аман жетуді қиялдаған,
Жан біткеннің арманы болсын ғасыл.
Қарт қуанып мәз болсын өсермен жас,
Жабырқау жан қалмасын, қабағын аш!
Жөргегінде жас сәби шалқып күлсін,
Жақсылықтан ғаламға мол шашу шаш!
Молшылықтың есігін айқара аш,
Жомарттығың әлемге болсын да паш,
Жер үстінде мейірім салтанат құрып,
Бір-біріне тірі жан болмасын қас.
Пәндаға бер қанағат, ынсап, ұят,
Әр жүректе гүлдесін зерде, зият,
Өнер-білім, ғылымға ауған көңіл,
Көктеп есіп, көгерсін болып мият.
Адам көңілі бұрылсын табиғатқа,
Қажеті оның зерттеліп түссін хатқа.
Жер — ұлы Ана талауға түспей жатқа
Құрметтеліп бөленсін ілтипатқа.
Жаңарсын да жасарсын байтақ дала,
Болып келген баршаға ризық, пана.
Таупық тауын Алланың уағызына
Бетін бұрсын бұзылып кеткен сана.
Зұлымдықтан арылсын күллі қоғам,
Жаңа ғасыр, мұрындық бол сен соған,
Адамшылық, ар-ұят, имандылық,
Әлеуметтік зор тұғыр болсын оған.
Кел, Жаңа жыл!
Кел, төрлет, жаңа ғасыр!
Жаңа тілек, жаңа үміт, арман асыл,
Алла құлы, ар ұлы ең зиялы
Болып өссін өмірге келген нәсіл.

20.02.2001 жыл.

---