Көңілім

Көңілім, мұнша қамықтың,
Әр нәрсені ойға сап.
Не нәрседен тарықтың?
Осыншама ойда қап.
Бірақ саған кінә жоқ,
Heгe бүйттің деуге де,
Есеп жетпес тіпті көп
Қасірет-қайғы кеудеде.
Мақсатыңды іздеген,
Таба алмадың, жетпедің,
Қылышын алып кезенген
Кедейліктен өтпедің.
Нашарлық байлап қолыңды,
Жібермеді отыр, деп,
Оппа қар ғып жолыңды,
Ниеті жоқ кетірмек.
Енді қайда барасың,
Босатпаса нашарлық.
Білімді қайдан аласың,
Әлемге үлгі шашарлық.
Қой, сен бүйтіп қамықпа,
Ілгері ұмтыл, талап ет,
Шығуға айдай жарыққа,
Қайраттанып, бол өжет!..

1917

---