Қалжың

Сені кеттім сағынып (бірақ қалжың),
Ойлап жүрмін сабылып (бірақ қалжың)
Құс жастық қып қалжыңды жастанып ап,
Ептеп-ептеп ақырын сыр ақтардың.

Сені көрдім түсімде (бірақ қалжың)
Сенсің жақын кісім де (бірақ қалжың!).
Бас жағына сөзіңнің қанаттанып,
Қалжың деген сөзді естіп құлап қалдым!

Аса алмаймын әдептен, іркілемін,
(Жел тербеген қайыңдай сыршыл едім).
Жылы тиер жүрекке сөзден қашып,
Қалжың айтса біреулер күрсінемін.

Итарқасын тікті әкеп көшпенді мұң,
Хабар күттім құстардан көктемгі күн.
Рас деші бұрынғы айтқандарым,
Қалжың деші ұмытып кеткендігім.
Өтінем!

---