Несіпбек Айтұлы

Соға кетсең қайтеді?

Бұл бетте «Соға кетсең қайтеді?» атты Несіпбек Айтұлы жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

24.09.2021
0
0
671

Соға кетсең қайтеді, жарқыным-ау,
Сағыныш пен уайымның парқы бір-ау!
Немқұрайды, қатыгез қарайтындай,
Арзан ба еді өмірдің нарқы мынау?
Әр минуты тірліктің қымбат қанша,
Өмір өтер кірпікті бір қаққанша.
Табамыз ба татулық, таппаймыз ба
Көз байланып,
Қарайып күн батқанша?..
Қайғы болсам,
Шаттық боп келмейсің бе?
Қайық болсам,
Толқын боп тербейсің бе?
Толастамас нөсер боп жауар едім,
Сахара боп
Сен маған шөлдейсің бе?..
Көз жасы боп келсең-ау күрсінгенде,
Шарайнасын шаң басқан жусын кеуде.
Қуат беріп, қуантып кетсең нетті
Қалжыраған...
Қажыған құр сүлдерге.
Не өтпейді ғұмырда бастан мына,
Жүздесуден жүрегің жасқанды ма?
Бала көңіл
Соқпағы біткен жерден
Ала көңіл
Сүрлеуі басталды ма?..
Соға кетсең қайтеді, жарқыным-ау,
Сағыныш пен уайымның парқы бір-ау.
Немқұрайды, қатыгез қарайтындай,
Арзан ба еді өмірдің нарқы мынау?!.

1980

Несіпбек Айтұлы соға кетсең қайтеді? Несіпбек Айтұлы өлеңдері

Пікірлер (0)

Пікір қалдырыңыз

Жиі қойылатын сұрақтар