Мәдидің ескерткіші алдында

Ассалаумағалейкум, Қарқаралы!
Шыдатпас сені аңсатқан жан талабы.
Жарқ етті тау басында жалғыз арша,
Арудай мені тосқан Арқадағы.
Дербес ел саған бүгін тамсанады,
Үр жаңа ән қозғайды таң самалы.
Басыңнан бұлттар көшіп,
Осы емес пе
Қайғы­шер Мәди айтқан тарқағаны.
Өткен күн бүгін анық байқалады,
Білгендер шын жүректен айта алады:
Зар қағып, Мәди әнін ұран етіп,
Бар қазақ қиын күнде қайталады.
Түрмеде жанға батып шаршағаны,
Мұң төксе ел аралап асқақ әні;
Бұл күнде ұлағаттап ұрпақтары,
Ескерткіш жарқылымен жар салады.
Еңсесін көтергендей сай­саланың,
Мәдиге белгі орнатқан бай талабың.
Есен бол, Ермегияев Амангелді,
Ел сүйер ерен жүкті арқаладың.
Естісін бүкіл қазақ шартарабы,
Бір әннің болды­ау, шіркін, қанша мәні.
Сол үшін алғыс айтқын ақтангерге,
Думан­той құтты болсын, Қарқаралы!

---