Сауыншы қыздар

Сары алтының себелеп сүйкімді күз,
Кең дала тұрған кезде тыныс ала,
Әнге шырқап келеді бір топ жас қыз,
Ортасында Мария Гурская.
Бәрінін, де кескіні гүл жайнаған,
Бәрінің де денесі тығыршықтай,
Сырнайшының саусағы күй ойнаған
Жүгіреді пернеде бейне ұршықтай.
Кестеменен әдемі өрнектелген,
Бәрінің де кофтасы, белдемшесі.
Сайрандауға бара ма жігіттермен,
Мұнша сәндеп бойларын жүрген несі?
Сұрастырсам, барады сиыр сауа,
Саусақпен емес, бірақ, электрмен.
Сиыр тұрған сарайда таза ауа,
Түк сезбейсің ішінде иіс, кірден.
Қыздар кіре, сүмесі сиырлардың
Электр қуатынан сорғыш киді.
Тамыры балқып қайдағы қиырлардың,
Сүмелерден сорғалап сүт боп иді.
Толып қалды ілезде ақ шелектер,
Көпіршіген кіршіксіз қою сүтке.
Заводқа тез жөнелді, деген «ап кел!»
Бидондарды машина тиеп жүкке.
Барған сүтті кідіртпей сепаратор
Центнерлеп, тонналап ағызса май,
Жылдан-жылға бұдан да болып батыр,
Бұдан-дағы Ұлы Отан болады бай.
Жылдамдатып қимылын, асығады,
Сауыншы біздің қыздар соны біліп.
Бірі ән айтса, бәрі де қосылады,
Әзілдесіп алады, кейде күліп.
Шат қыздар, электрдің қуатын тез
Қос сүмеге, сиырлар жылдам исін!..
Содан аққан майларға болып тез кез,
Жігіттердің сүйетін аузы тисін.

1953

---