Уайымдаймыз несіне?!

Уайымдаймыз несіне?! Түңілеміз,
Шешім іздеп сан - саққа жүгінеміз.
Пешенеңе қашалған тағдырыңның,
Тұз дәміне бұйырған бүгілеміз.

Уайымдаймыз несіне?! Сыналғанбыз.
Мың шашылып, қайтадан құралғанбыз.
Бәріміз де білместің суын ішіп,
Сан кешірім сұрадық құдайдан біз.

Өзгермейді адамдар, түрленбейді.
Біреулердің арлары кірленбейді.
Уайымдаудың қажеті бар ма сірә?
Қасиетсіз - ақылға именбейді.

Жылатады кейде өмір құлатады,
"Нәпсі құдық" толмайды, сұратады.
Сүйгеніңнің артында - сүймесіңді,
Сүйдіретін кездері - сұлатады.

#жүректегіжазбалар_АлтынайАлиева
#жүректегіжазбалар
07.08.21ж

---