Дүбірлі күндер өтті дөңеспенен

Дүбірлі күндер өтті дөңеспенен,
Дабылды жылдар жетті белеспенен.
Балам-ау, күліп тұрған сені көрсем,
Жастығым көз алдыма елестеген.
Қайта алмай жастығыма, қарайладым,
Аралап туған жердің бар аймағын.
Келші ұлым, мезгіл жайлы сырласайық,
Алдында қатар тұрып шарайнаның.
Ізіміз қатар түссін жер бетінде,
Жер беті ұрпақтарын тербетуде.
Туған жер құшақ жайып, тебіреніп,
Қанатын қыран құстың серметуде.
Сен-дағы мұңаймашы, күрсінбеші,
Кеудемде жүрек болып дүрсілдеші.
Сүйеніп бәйтерекке бала қайың,
Тербеліп тіршіліктің тұрсын кеші.
Сен менің бүгінімсің, ертеңімсің,
Өмірде жалықтырмас ертегімсің.
Жанымда сен болғасын биік ұшам,
Көңілде күмбірлеген көркем үнсің.

---