Үміт керек саған да, маған-дағы

Үміт керек саған да, маған-дағы,
Жылтырасын сары шам бағандағы.
Үмітпенен жасарып жер дүние,
Үмітпенен жайнайды адам бағы.
Қызғалдақтар құлпырып көркем белден,
Өрнек кетсе өміршең өркендерден,
Көлік тосқан сапарда жолаушыдай
Үміт күтіп жүреміз ертеңдерден.
Сенің-дағы үмітің жоғалмасын,
Көлдер іздеп тапқанда көк арнасын.
Алма ағашы үмітпен ұмтылады,
Құлатқанда бұтағы көп алмасын.
Жарқырайды бір шырақ күні-түнмен,
Қойныңда оны жүресің жылытумен.
Басқа таққан үкіңнен айырылма,
Есің болса, адаспа үмітіңнен.