Картаға түспеген өзендер – Темірхан Медетбек

Жоқ олар әлемдiк картада.
Шықпаған атағы асқақтап,
сыймаған тарылған масштабқа;
құмайттан, шөлейттен қашқақтап,
табанын тiлдiрiп тастаққа –
ағады бозбала қанындай
көктемде – алқынып;
жалынсыз шағымдай
шiлдеде тартынып.
Жоқ олар әлемдiк картада.
Бар олар Сiбiрде, Кавказда, Арқада.
Ағады кектей жұлқынып,
қас батыр Қара Жер белiнен
қылыштай суырылып.
Күй етiп долданып
арнасын – алқымын,
ұстамай өксiгiн, солқылын
быт-шыт қып тастарға
ұрады толқынын,
кiшкене денесiн
күреске толтырып.
Керегi жоқ тiптi оларға
Беделi атақ пен даңқтың.
Картаға түспеген өзендер
бостандық, күрес пен шабыттың
тамыры сияқты
соғып тұр.