Мен сондай болдым

Шәкiр Ыбыраевқа

Елiмдi
Ел етемiн деп,
Жерiмдi
Кеңейтемiн деп
Байыз таппадым!
Қылышымды
Қылдай жұқарғанша сермедiм.
Найзамды
Тебендей жiңiшкергенше сiлтедiм.
Жер қаптым.
Омалдым.
Дұшпанның мойнына
Жылан боп оралдым.
Тұман боп тұтасып,
Бұлт боп көштiм мен.
Күндi де кештiм мен.
Түндi де кештiм мен.
Дәрмен күткем жоқ
Ешкiмнен!
Қағып-қағып
Қанымды iштi.
Соғып-соғып
Сөлiмдi iштi.
Қайтпадым!
Омыртқамды
Күтiрлетiп үздi.
Қабырғаларымды
Бiртiндеп үздi.
Бiрақ ештеңе айтпадым.
Қарыстым!
Өлiп бара жатып та
Бөрiдей алыстым.
Мен сондай болдым!