Темірхан Медетбек

Қалай адаспайсың?

Бұл бетте «Қалай адаспайсың?» атты Темірхан Медетбек жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

17.06.2022
0
0
832

Қарыс жер көрсетпей –
Тұмшалаған! –
Тұманның iшiнде қалсаң
Қалай адаспайсың?
Не сенерiңдi бiлмей,
Не сенбесiңдi бiлмей,
Не көнерiңдi бiлмей,
Не көнбесiңдi бiлмей
Күмәннiң iшiнде қалсаң
Қалай адаспайсың?
Қалай адаспайсың?
Қара бұлт басып
Қара түнек болған
Түнде қалсаң;
Айтарыңды
Қақыратып айтатын
Тiлден қалсаң –
Қалай адаспайсың?
Құжынаған
Өтiрiк пен өсек
Ортасына алып
Iбiлiс пен жын
Жан-жағыңнан қамап жатса
Қалай адаспайсың?
Бiлсең айтшы! –
Қаптаған
Тұман мен түндi
Өтiрiк пен өсектi,
Iбiлiс пен жынды
Бұл тiрлiктен
Қалай аластайсың?
Аластай алмасаң
Қалай адаспайсың?

Темірхан Медетбек қалай адаспайсың? Темірхан Медетбек өлеңдері

Пікірлер (0)

Пікір қалдырыңыз

Жиі қойылатын сұрақтар