Көктем желі

Сақылдаған сары аяз,
Боран мен борасын,
Омбы қар...
Бәрi де, бәрi де кеттi-ау;
Аспанмен
Отар-отар
Табын-табын бұлттарын айдап
Көктемнiң желi де жеттi-ау.
Күйреген қатал қыстың
Қираған дүние-мүлкi құсап
Өзендерде
Сең ағып жатыр.
Алып Қазақстаным
Майданнан шыққан батырдай
Көктемгi желмен
Кеудесiн толтырып
Дем алып жатыр.
Таулардың
Сауыс-сауыс етектерiндегi
Қасат қарлар мен
Көкпеңбек мұздардың
Күтiр-күтiр сөгiлуiн-ай...
Құс бiткеннiң
Көлдер мен тоғайларға
Қанатты телеграммалар құсап
Аспаннан сауылдап
Төгiлуiн-ай!
Пай-пай-пай!
Көтемгi жел әкелген
Осынау
Шабытты шақ қандай:
Бiр әрi, бiр берi бұлғақтаған
Ағаштардың жалаңаш бұтақтары
Ақындардың қолдары секiлдi
Ауаға иректеп
Жыр жазып жатқандай.

---