Дағдарыс суреттері – Темірхан Медетбек

Күздің қара желіне
Заманның қара желі қосылып
Дүниені жүндей түтуде,.
(Қатыгез уақыт
Қатыгез сот құсап
Қол қойып жатқандай
Қатал үкімге).
Жұрт біткен жабықты,
Жұрт біткен қамықты...
Қаланың биік- биік үйлері
Омырауы мен арқасына
Диуананың шапанындағы
Әлем- жәлем жамаулар секілді
Әлем- жәлем жарнамалар
Жапсырып алыпты.
Тірліктің кеткен бе кетеуі?..
Ұйтқыған мына жел
Ұры иттер мен
Сұқ иттер секілді
Қуыс-қуысты тіміскілеп
Сумаң-сумаң етеді.
Тас жарып, тау бұзатын
Әне бір азаматтың
Бүк түсіп
Зар қағуын-ай...
Мына адамдардың
Бірде ол жаққа,
Бірде бұл жаққа жүгірген
Қаңбақтар құсап
Сенделіп, сандалуын-ай...
Әне бір әйелдің
Шарасыздық буып
Шыңғырғанынан
Құлақ тұнғандай.
...Желменен иіліп-бүгілген
Көше бойындағы ағаштар
Арық бұтақтарын созып
Өткен-кеткеннен
Қайыр-садақа
Сұрап тұрғандай!..