Білсең айтшы – Темірхан Медетбек

Айнала тып-тыныш.
Әдеттегідей
Бірде күн шығып,
Бірде жауын жауып тұр...
Осы бір тыныштықтың
Шырынын сорғандай
Сағат біткен тамсанып
Таңдайларын қағып тұр...
Айнала тып-тыныш.
Бірде тымырсық,
Бірде жел соғады...
Әне бір қария
Қырға шығып ап
Жер шолады...
Айнала тып-тыныш.
Орнында тау-тас та,
Орнында жал-құм да...
Қалалардағы
Жезөкшелер де орнында,
Қайыршылар да орнында.
Айнала тып-тыныш.
Домбыра да үнсіз,
Үнсіз қобыз да...
Алматының кәрі ақындары
Тізелері дірілдеп,
Тұмсықтарынан су ағып
Махаббат туралы жырларын
Жарысып жазуда.
Айнала тып-тыныш.
Ішетіндер ішуде,
Ішпейтіндер ішпеуде.
Жоғарыдағы билік —
Айтулы! —
Құрама Командасымен
(Әдеттегідей
Алдымен өздерін ойлап)
Жұмысын істеуде.
Айнала тып-тыныш.
Жоқ қазір
Жамандық дерегі.
... Бірақ та бәрі-бір
Ызалы кекті ойлар
Беті жабулы
Ашыған қамырдай боп
Ақырын
Көтеріліп келеді.
Білсең айтшы! —
Неге?