Қысқы серуенде

Маң-маң басқан
Бір кісінің жетегінен
Кішкентай ит көрдім:
Алматыда мұндайдың
Не түрі бар.
Әлгі қанденнің
Үстінде —
Қымбат камзол,
Аяғында етігі бар.
(О, жаратқан құдірет!
Итке көрсетілген
Бұл неткен құрмет?!)
Осы сұраққа жауап таба алмай
Жан- жүрек
Сансырап тұр.
Алтын жалатқан
Шынжыры
Көздің жауын ап
Жарқырап тұр.
Құдай- ау,
Адамға емес,
Итке көрсетілген
Мұндай
Құрметті көргенше
Өлсең нетеді?!
... “Митингіге” жиналып
Жатыр деп қорқа ма
Үйсіз, күйсіз
Бір топ қаңғыбас иттерге
Әлгі қанден
Шәу- шәу етеді.
Дауысы қандай ащы!
Кісәпірдің
Жағымсыз естілер
Үкімі секілді.
... Осы бір ит
Биліктің жетегіндегі
“Зиялы қауымның”
Шәуілдеп үретін
Өкілі секілді.

---