Ұлы мәртебелі өтірік

Дәл қазір
Жоғарыда жүргендер де,
Төменде жүргендер де
Газет беттерінен,
Теледидардан
Жұздері бүлк етпей
Өтірікті
Соға береді.
Олар бүгінде
Ұлы мәртебелі Өтірікті
Мәңгілік ұлық,
Мәңгілік Дара көреді.
Өтірік дегенің
Сүйекке түскен
Құрт аурудай
Бүкіл Қазақстанды
Кеміруде.
Сол бір құрттар
Өтіріктен ісініп,
Өтірікпен семіруде.
Оранған
Үлде мен бүлдеге
Дәл қазір
Өтірік дегенің
Ең биік мінбеде.
Бейшара Шындығың
Қайыршыдай боп
Көше- көшені кезіп
Қаңғып жүр.
Ал өтірігің
Борсықтай толысып
Басымызға
Құзғындай саңғып жүр...
Апыр- ай,
Күн- түн демей
Ұлы мәртебелі
Өтірікті мақтап—
Әлемді жаңғыртып! –
Жар саламыз.
Күн- түн демей
Ұлы мәртебелі
Өтірікті жақтап—
Әлемді жаңғыртып!—
Қол соғамыз.
Біз енді
Бұдан былай
Қандай бір шындықты да
Өтірік көретіндейміз.
Біз енді
Бұдан былай
Шынымен өлсек те
Өтірік өлетіндейміз...
Құдай ақырын берсін!

---