Бір машина бұлт – Темірхан Медетбек

Түсімде кілең
Аталас досым
(Сүйілшіш бабадан тараймыз),
Парталас досым
Өзімнің Сеңгірбайым
Шөп сияқты артып
Бір машина
Бұлт алып келеді.
(О, құданың құдіреті,
Сол кезде маған
Сиқырлы бір
Шабыт келеді.)
Сонда да бәрі бір
Сеңгірбайды—
Мынауың не деп! –
Сөзбен қағытып
Түйреп күлем.
Сеңгірбай сұстанып:
Былай дейді:
“Бұл бұлтты
Нұртас ауылы
Аспаннан аударып
Сен үшін
Тиеп берген.”
Сонан соң мен
Сеңгірбай әкелген
Бір машина бұлтты
Үйіме тасып жатамын.
Арасынан шыққан
Бұлқынған
Қып-қызыл найзағайларды
Бауырыма
Басып жатамын...
Ауылдан келген
Бір машина бұлт...