Қырдағы жолда

Үй сыртында бұлқынып
Әне пар ат жегілді,—
Арбаға ақын отырып
Кетті. Алда жол керілді...
Жидебайды бір шолып
Жол тартты ақын Семейге,
Тұрды алдынан жел соғып
Жыр қанатын демеуге!
Жайлауда ылғи тігілген
Киіз үйлер тізбегі
Қалды алыста көрінген,
Шабысын пар ат үзбеді...
Қырда жылқы кісінеп,
Қой-қозылар маңырап,
Жылғаларда кішірек
Жатты бұлақ жамырап...
Қойшылардың қалқиып
Тұр қараша үйлері...
Қабағын ақын сәл түйіп,
Бір өлең бойын биледі...

---