Көңілім

(Қызыл әскердің он жылдық мерекесі күні)

Жаңа жаным жадырап жайраңдады,
Жада күн шашты әлемге алтын нұрын.
Жаңа шабыт шарқ ұрып, тіл сайрады,
Жеткендей жер түбіне асқақ үнім.
Жаңа жырым жібектен тақты қанат,
Жаңа көңілім толғандай тәтті күйге.
Жаңа мұңнан арылдым, көңілім шат,
Жаңа ауа кіргендей біздің үйге.
Бетінде кәрі тарих бұл ұлы күн
Алтынменен жазылған қалар ізі.
Шұғыласынан аспанда жарқырар түн,
Нұр шашар ай, күлімдер көк жұлдызы.
Жаңа тілім күй сандық құлпын ашты.
Жаңа көңілім шаттықтың гүлін шашты.

---