Тәуелсіздік – Гүлмекен Қасенбай

Тәуелсіздік — баға жетпес ұлы сый,
Тәуелділік — жатқа иілу құрысын.
Тамаша елде,​ тату-тәтті күн кешіп,
Тағдырыма шүкір айтам бүгін шын.

Тәуелсіздік — келмеді оңай жолменен,
Темір төзім сыналды аштық,​ қанменен.
Талай боздақ қыршынынан қиылып,
Торда өтті қанша ғұмыр «ел» деген.

Туын ұстап, басқыншы елге бағынып,
Таңдай қағып,​ тек соларға жағынып.
Тексіздікке,​ арсыздыққа былғандық,
Тынысымыз «иман» деген тарылып.

Таршылық пен қоршылықта жасадық,
Тілден безіп,​ жау тілінде ән салдық.
Түрімізді ұқсатқанмен еліктеп,
Тәнімізде жүрек соқты «қазақ» боп.

Талай ғасыр тастай езген отарлық,
Түп-тамырмен жоқ боп кетсін топан боп.
Таза ауамен тыныстасын туған жер,
Тың даласы дамылдасын шудан көп.

Топты жарып таланттары қазақтың,
Тамсандырсын дарынымен ғажап мың.
Таң қалғаннан төрткүл дүние толғанып,
Тек қазақпен дос болуға талассын!

Текті, адал, иманды ұрпақ көбейсін,
Тәлім берер ата-аналар көп болсын!
Талантты, дарынды боп әр ұстаз,
Таңғажайып нәтижеге қол жетсін..!!!

Гүлмекен Қасенбай