Биыл қыс – басқа қыстан салқынырақ – Жадыра Байбұланова

Биыл қыс – басқа қыстан салқынырақ,
Жүргем жоқ тұтас әлем шалқып, ұнап.
Біреу кеп, бір-ақ сәттік сезім сыйлап,
Өзімен кеткен сынды артығын ап…

Жауабын іздеуменен «бұл қалайдың»,
Таң атса бірге ағарып, Түн қарайдым.
Қар-қырау қатып қалған жүректі кеп,
Жалаңаш қолдарыммен тырналаймын…

Табылса, іздегенім – таптатқызбан!
Аршып сәл алайыншы қатқақ, мұздан.
Неге ызғар соқты мұнша аппақ қардан,
Неге мұң қалды мұнша аппақ қыздан?

Бастағы болып барлық індетке емші,
Сол мұңға себепші жан, жыр боп келші!
Жүректен мұз құрсаулы тоңып қалған,
Жылытып, алақанымды үрлеп берші.