Дұрыс қой сенің кетіп қалғаның

Дұрыс қой сенің кетіп қалғаның,
Мендегі бұлдыр Әлемнен!
Кембағал еді, кетік-ті арманым,
Сен келмей тұрып, әуелден…

Шыдай алмасың шын, ағыстарға,
Тағдыр сап берген белгімен!
Өзім сенбейтін қуаныштарға,
Өзіңді қайтіп сендірем?..

Сол күмән бізді тыныш қоймады,
Қайғымды қан ғып жұттың іш.
Ұмытсаң мүлде — дұрыс қой, бәрі…
Сағынбасаң да — дұп-дұрыс!

Қасірет тұман торуы жанды,
Сен бірақ мұңға малынба!
Кетсең… Бір себеп болуы заңды,
Және оны айтпағаның да!

Заңдылық кету — бөлек болғанда ой,
Сыртымда және ішімде!
Жоғалту Сені керек болған ғой,
Өзімді табу үшін де!

---