Махамбет

Махамбет асқақ тұлға зеңгір қиян.
Ісі – ерлік, өзі жалын, сөзі – ұран.
Жан-жақтан,
Дұшпан қаптап ел тозғанда,
Саңқ етті бұлтты жарып алғыр қыран.

Қайырмасы:
Жаралған жаны намыстан,
Айбатты туған арыстан.
Ереуіл атқа ер салып,
Жапырды жауын шабысқан.
Туған елдің көсемі
Ақ патшамен қарысқан,
Хан, төремен алысқан
Сұңғыла сөзі сұрапыл,
Ақындық қонған данышпан;
Әруақты бабам Махамбет
Тәуелсіз елмен табысқан.

Рухы қуат болған асылымыз,
Бар қазақ шын көсемі батылымыз.
Айтарын жебесімен жазып кеткен,
Өлшемі кайсарлықтың батырымыз.

Қайырмасы

Біртуар Махамбеттей қарқынды адам,
Талпынам білсе екен деп даңқын ғалам.
Рухы мәңгі бірге туған елмен,
Жанартау от жалыны сарқылмаған.

Қайырмасы

---