Аман болшы, жан жарым

Біз табысқан күннен бастап мендегі
Сөнбей келед(і) саған деген сенімім.
Наласы көп,
Жаласы көп Жердегі
Қаталдықтан қорғап жүрген серігім.

Биік болсын самғарың,
Жүйрік болсын талғамың!
Бар тілегім, арманым -
Аман болшы, жан жарым!

Ашулансам, әзіліңмен алдандым,
Сырқаттансам, қасымда таң атырдың.
Азалансам, сынағына жалғанның,
Сабырлық пен батылдыққа шақырдың.

Қол ұстасып бір өткізген уақытта
Тағдырымның талайларын таныдым.
Алғыс айтам шын жеткізген бақытқа,
Шаттық нұрын шашып тұрған жарығым.

---