Ғашық болып көру керек – Айгүл Қадыр

Ғашық боп көру керек,
Өмірді ұғу үшін.
Іштегі менмендікті,
Бір жола жығу үшін!

Қиялдап, арман қуып,
Бақытты күту үшін.
Біреуді сағынғанда,
Сабырың біту үшін!

Ғашық боп көру керек,
Ғаламды сүю үшін.
Оны ойлап оңашада,
От болып күю үшін!

Қызғанып, күлге айналып,
Азапқа бату үшін.
Әртүрлі сезімдердің,
Мың дәмін тату үшін!

Ғашық боп  көру керек,
Бір жүлде ұту үшін.
Құштарлық, ынтығудың,
Бал дәмін жұту үшін.

Тағатың таусылса да
Үмітті үзбеу үшін.
Шарт-пұрт боп, ашуланып,
Артынша іздеу үшін!

Ғашық боп көру керек,
Риясыз күлу үшін.
Әлі де мына әлемде,
Тірі боп жүру үшін!
Айгүл Қадыр