Жек көрем – Серік Зейнетайұлы Жұмат

Владимир Высоцкийден
Я не люблю

ЖЕК КӨРЕМ

Жек көрем қисынсыз қиялды,
Түңілмей ешқашан өмірден.
Жек көрем жылдың бар мезгілін,
Жырларым шықпаса көңілден.

Жек көрем паңданған бектікті,
Менменге сенбеймін тағы да.
Хатыма көз салса жымысқы,
Білдірмей кеп тұрып жаныма.

Жек көрем сөзімді бөлгенді,
Тыңдамай жартысын, ширегін.
Жек көрем ту сырттан оқ атса,
Немесе қапыда тигенін.

Жек көрем сандырақ, шатпақты,
Иненің жасуын тапқандай.
Жүндердің түтесін шығарып,
Темірмен әйнекті шаққандай.

Жек көрем сезімді тойынған,
Одан да тұсалып тұрамын.
Жетеді «құрметтім» десе егер,
Ар жағын көзінен ұғамын.

Көргенде қанатты қайырылған,
Аяныш жоқ менде бірден тек.
Төзбеймін қорлыққа, зорлыққа,
Тәңірмен тұрғандай бетпе-бет.

Өзімді жек көрем кей кезде,
Әлсізге бармасам көмекке.
Күйінем жаныма жара сап,
Намысқа түкірсе желөкпе.

Жек көрем дыр-дулы алаңды,
Ақшаға, арбауға үйренген.
Алдымда болса үлкен үзіліс,
Ондайдан мүлдемге түңілем!

Аударған Серік Зейнетайұлы Жұмат