Махаббат теориясы

Махаббат теориясы

Махаббат жайлы бір қызық жайды естідім,
Жаратқан бізді қызғанады екен өзгеден.
Ессіз сүйсеңіз Алладан асып біреуді,
Сынайды екен ажыратып сол бір пендеден.

Ол мейлі сіздің сүйіктіңіз бе, жарың ба?
Ұл-қызың ба әлде қуаныш сыйлар жаныңа.
Ата-анаңыз ба? Бауырыңыз ба ең қымбат...
Қоя көрмеңіз ешкімді құдай орнына!

Махаббаттың да болады екен шет-шегі,
Жек көру менен сүюдің жақын өзегі.
Жүректер біздің құдайдың ғана қолында,
Қаласа - дос қып, қаласа - қас та етеді.

Махаббат деген - сезімнің қарсы шығуы,
Көңіл-күйіңнің ақылдан бөлек тұруы.
Жүрекке ғана оңаша келіп сыр айтып,
Ми мен ойыңның пендеге ғана сиынуы!

Махаббат жақсы - орнымен болса егер де,
Шын ғашық адам зұлымдық етпес өзгеге.
Махаббат егер қызғанышпенен дос болса,
Дайын тұрады жан-жағын түгел өртеуге!

01.10.2025.

Гүлмекен Қасенбайқызы

---