Мама-ау

Мамау
Дүниеге әкеліп дара қылған,
Тартып тартып өстік қой балағыңнан.
Мынау жым-жырт әлемде жұмбақ болған,
Жақсылықты көремін жанарыңнан
Мамау
Айтарым да таусылмас көп ішімнен,
Өнегелі ғұмыр кеш өрісіңмен.
Бір бақытты жымиған жүзің үшін,
Бәріне де дайынмын сен үшін мен!

Жабырқасақ барлығын байқадың кеп,
Құдай берсін жақсылық - қайтарым деп.
Өзіңді емес, біздерді ойлап жүрсіз,
Алғысыммен анама айтарым көп.

Әкеммен әулетімнің көші дара,
Алты рет тербетілген бесігі ана.
Жұмыс-жұмыс деп жүрсің, біздер үшін,
Жастығыңды ұрласақ кешір ана.
Жас күніңді ұрласақ кешір ана.

Мамау
Жасасын деп әрдайым әкем тегі,
Мамық мама маматай мекендегі!
Жолға дейін көтеріп апарушы ең,
Балшық боп қалмасын деп бәтеңкемді.

Бас бармақпен бағаң бар жақсы деген,
Армандарға жете бер басты деген!
Көлденең көк аттының күйін кешпей,
Тура айтатын тұлға деп жақсы көрем.

Белгілі тек тілекші екеніміз,
Шаттыққа тола берсін мекеніміз.
Ұл-қызың жетістікке жете білсе,
Міне оған себепші екеуіңіз.

Елу жас - еңселі жас жалпылаған,
Әкем мен асыл жансыз жарқыраған.
Аллаһым ұзақ ғұмыр нәсіп етсін,
Ақ тілегін арнайды алты балаң!
Ұл-қызың, ұрпағыңның қызығын көр,
Алты құрсақ көтерген алтын анам.

Авторы: Нұрсұлтан Мейірбекұлы , авторды белгілеуді ұмытпаңыз @sunadillaev

---