Әйелмен әлем бақытты

Сұлу ма әлде, сүйкімді ме, суық па?
Орта бойлы, арық па, әлде толық па?
Әйел деген - нұрын шашқан шамшырақ,
Әйелдерсіз үй толмайды бақытқа!

Ұрыссаң да, тиіссең де сөзбенен,
Сын айтсаң да әр ісіне істеген.
Шыныңды айтшы,
Әйелменен ғажап қой?
Әйел құйған шайдың өзі балмен тең!

Күйеулерін хандай күтіп, жорғалап,
Ас дайындап, кірін жуып, үй жинап.
Ұрпақ жалғап, ақша табар және де,
Қазақ әйел, болмысың бар шын ғажап!

Мойымайтын не қиындық көрсе де,
Жеңілмейтін қандай сынақ келсе де.
Қажет болса қару асып майданда,
Жауға шапқан, біздің қыздар емес пе?!

Биік қойған ар-ұятын ақшадан,
Бола білген адал келін, жақсы адам.
Ата-енесі ақ батасын жаудырған,
Қазақ келін - мен сенімен мақтанам!

Ез болса да, ер болса да, күйеуі,
Тастамайтын, отбасын шын сүйетін.
Сатқындыққа ғана жаны төзбейтін,
Біздің қыздар шаңырақтың киесі!

Көз жасы оның төгілмесін бекерге,
Әйел деген - жылулық пен береке.
Жанына үңіл, сөзін тыңда, жарыңның -
Оған бәлкім керек шығар бірнәрсе...

Әйел сенен сұрамайды күн, айды,
Оған сенің қамқорлығың ұнайды.
Бір тал гүл ме, шоколад па, бәрібір,
Сыйлап тұрып, құшақташы...
Жылайды.

Жылайды әйел қайғырса да, күлсе де,
Әйелдердің көңіл-күйі бір төбе.
Сезінсе егер айналадан мейірімді  -
Әйел үйін айналдырар пейішке!

Әйел достар, бар болыңдар, мың жаса!
Сендер барда күнде мейрам айнала.
Ешбір әйел жыламасын қайғыдан -
Қуаныштан жылай берсін, қаласа..
Әйел деген - мемлекеттің жүрегі,
Жүрегіміз аман болсын, әрқашан!

Гүлмекен Қасенбайқызы