КҮЗГІ ӨЛЕҢ – Мықтыбек Оразтайұлы

Мына мезгіл қалай әсер етеді?
Сарғыш тартты анау қырдың етегі.
Саған деген сағынышым солайша,
Салқын желмен құрақ ұшып жетеді.

Алып-ұшқан сезімімді ноқталай,
Күндер өтті қайырылмай, тоқтамай.
Қоңыр күзден іздегенмен жылылық,
Жаз қалдырған бір белгі жоқ, әттең-ай.

Жүрегімде талай-талай сыр барын,
Ұқтыра алмай алаулайды бір жалын...
Сезімдерім құнсызданып кеткен бе?
Саған онша ұнамай жүр жырларым.

Жүйрік жылдар жетелеген арманға,
Өткен шақта естелік боп қалғанда,
Шынымен-ақ салқын тартса сезімім,
Шын құлаған ықыласым жалған ба?

Сезіміме түссе-дағы тез кірбің,
Келмейді олай салқындықты сездіргім,
Қоңыр күзді кінәлар ем сол үшін,
Бірақ нендей жазығы бар мезгілдің??