Іле сыры

Қашанғы сараң кəрі Іле,
Хақым жоқ сырыңды айтпасқа.
Қарысар күш жоқ кəріңе,
Қайрылмай ақтың Балқашқа.
Құйып ап қыруар өзеңді,
Қиырға тарттың татқызбай.
Ерніміз қанша кезерді
Қасық су түзде тапқызбай.
Есілген құмы арнаңда
Ентелей ақтың тоқтамай.
Еңкейе тұрып жарларға
Қызығын көрді тек тоғай.
Телміріп екі жағыңда
Шөлдеген сұлық жер жатты.
Қарай да қарай ағынға,
Қашан да өзін алдапты...
Толқының толы нұрыңды
Тастапсың терең лайға.
Таппапты оны ел бұрынғы,
Көрмепті тіпті құдай да!..