Жүрек

Кеудеде тыныс от жүрек
Денеңді тынбай жылытқан.
Сақтаған сені осы тек
Өмірде ыстық, суықтан.
Жарастық десе ұмтылып,
Талпына құс боп ұшады;
Жамандық сезсе, бұлқынып,
Кеудеңді қатты қысады.
Ынтықса, ылғи асығып,
Алдырмас дамыл, ол шіркін, –
Тарынса, бойын жасырып,
Таптырмас сырын кей дүркін.
Түңілсе түрі тұнжырап,
Көрсетпес түбін жылымша;
Шырайы күндей жадырап,
Жарылқар сені жылынса,
Денеңнен қайрат кетсе де,
Суынып сөнбес ол сезім.
Сүйкімді кімге шертсең де,
Жүректен шыққан сол сөзің!