Той үстінде

Қыздыр тойды, құй шарапты,
Күмпілдет бір күй шанақты,
Сұңқылда, енді сұңқар жаршы,
Тыңдаушының айызы қансын,
Ей, шырқаңдаршы,
Қайсың барсың?
Көңіл шіркін жайлансын бір
Сорғала күй, дөңгеле би,
Ойнасын нұр, жайнасын гүл,
Кек күмбездей дөңгелеп үй.
Стаканда күн нұры бар,
Күміс толқын сыңғыры бар,
Таң алдында ұшқын атқан
Ала бүршік қыр гүлі бар.
Жатыр солар быж-быж қайнап,
Бокалдарда көбіктеніп.
Той ағасы! Қыздыр жайнап,
Той-думанға желік беріп.
Құттықтайық қыз-жігітті,
Жалғастырар жол алысын,
Соларға артып ізгі үмітті
Көтерелік солар үшін!
Думандатып қыста таңды,
Шырқа шабыт — шырқа құсым!
Көтерейік стаканды
Келер жаңа ұрпақ ұшін.
Құлақты түрсем ән-күйге,
Түседі жаным әр күйге.
Ұқсаймын шалға аққудай,
Ұқсаймын гүлдей сәбиге.
Толқындар шулап көшеді,
Көкірегімді кепір ғып.
Жүректе желдер еседі,
Түседі бұлттан от ырғып.
Болсам да қанша тас берік,
Айырылып ерік-күшімнен.
Мөлтілдеп көзге жас келіп,
Балқимын еріп ішімнен.
Кетемін жұрттыц қасынан
Қиянға ұшып қиялмен.
Өзендей толқын басылам,
Өртеніп-жанып күй-әнмен.