Құс санау

Бір дегенім – Бүркіт,
Көрген емес үркіп.

Екі дегенім – Ителгі,
Жем алуға икемді.

Үш дегенім – Үйрек,
Сусыз жерде сирек.

Төрт дегенім – Тырна,
Ұшып жүрер қырда.

Бес дегенім – Бұлбұл,
Өнерлі құс бұл бір.

Алты дегенім – Аққу,
Ақ мақтадай – ақ бұл.

Жеті дегенім – Жылқышы,
Көл еркесі жыл құсы.

Сегіз дегенім – Сауысқан,
Кезіп елді тауысқан.

Тоғыз дегенім – Тоты,
Әдемі құс осы.

Он дегенім – Көкек,
Күнде салған секек.

Он бірінші – Қасқалдақ,
Айтшы, неден жасқанбақ?!

Он екінші – Қаршыға,
Аң ауласар аңшыға.

Он үшінші – Шымшық,
Көрген емес тыншып.

Он төртінші – Безгелдек,
Далада оған кез келдік.

Он бесінші – Күшіген,
Адам қорыққан ісінен.

Он алтыншы – Бөдене,
Жолды кесіп кезеді.

Он жетінші – Балықшы,
Көлден аулар балықты.

Он сегізінші – Пингвин,
Ұшпайтын құс, білем.

Он тоғызыншы – Кекілік,
Тұзаққа түсер секіріп.

Жиырмасыншы – Дуадақ,
Семірсе, ұста қуалап!

Бастан-аяқ санап көр,
Жиырма құсты санап бер.
Ашықса құс, – аялап,
Шамаң келсе, тамақ бер.

Өстіп санар санамақ –
Саңға жүйрік талапкер!
Еңбегіңді бағалап –
Қонса кей құс паналап,
Ұя салып, көмек бер!